Is giugis de su T.A.R. de sa Sardìnnia ant scrocorigau s’arrecursu presentau de sa Regioni contras de s’ordinàntzia de su ministru Speranza chi iat fatu pintai s’ìsula nosta in colori de aràngiu finsas a domìnigu 7 de friàrgiu. Comenti si siat de lunis 8 sa Sardìnnia torrat in colori grogu. E insaras immoi, mancai a sa lestra, arregordaus is arrègulas de cumportamentu chi bolint sighidas me in is zonas in colori grogu.
Fait a si transiri de unu logu a s’àteru? Me in is zonas in colori grogu, de is cincu de mangianu a is dexi de noti non tocat a giustificai is transiduras chi fadeus in Sardìnnia etotu. Invècias, finsas a su 5 de martzu, si besseus a su noti intra de is dexi e is cincu de mangianu, depeus essi capatzus de cumproai ca si seus transius po chistionis de apretu mannu, po chistionis de traballu o po chistionis de saludi. Custus motivus bolint scritus in s’autodecraratzioni chi is fortzas de s’òrdini, s’in casu si firmant, s’ant a fai cumpilai. Chini non decrarat sa beridadi fait unu reatu.
Is personas bessidas foras de pari podint andai a abisitai a is fillus minorennis a domu de s’àteru genitori o a domu de s’afidatàriu.
Nci podeus acumpangiai a is fillus nostus a domu de is ajajus, ma consillaus de non ddu fai poita ca is antzianus funt intra de is categorias prus in arriscu de ndi piscai sa Covid-19.
Is abisitas a domu de parentis o amigus si podint fai, intra de is cincu de mangianu e is dexi de noti, totu a su prus in duas personis, a prus de is fillus chi tenint prus pagu de 14 annus o de is personis disàbilis o no autosufitzientis chi bivint in sa pròpia famìllia.
Podeus andai a abisitai a is parentis chi s’agatant in presoni.
Atendimentu de amigus o parentis non autosufitzientis. Podeus andai a ghetai una manu de agiudu o a atendi a unu parenti o a un’amigu chi non funt autosufitzientis. Arregordau-si-ndi però ca, si funt personis antzianas, funt prus in arriscu de ndi piscai sa Covid-19 e, duncas, depeus donai atentu mannu. Prus pagu genti biint, mellus est!
Transiduras de chini est in corantena o in isulamentu. Chini est sutapostu a sa corantena de seguresa, poita ca est beniu in cuntatu cun d-unu positivu a sa Covid-19, o a s’isulamentu in domu, poita ca est positivu a su virus, no podit bessiri. Si unu est in corantena, podit bessiri sceti po fai is averiguaduras dianniòsticas arretzetadas de su dotori.
Si unu presentat sinnus de arresfriu o portat sa calentura. Totu cussus chi presentant sinnus de arresfriu o portant sa calentura prus arta de 37,5 si ndi depint abarrai in domu e depint avisai a su dotori insoru. Depint donai atentu fintzas a is cuntatus cun is familiaris insoru, poita ca – si funt positivus – arriscant de ddus impestai a issus puru.
Fait a bessiri? Podeus bessiri foras de su comunu innui biveus po fai còmporas de cali siat calidadi (alimentaris e no).
Is voluntarius impignaus in servìtzius po s’emergèntzia de su Coronavirus podint bessiri.
Sèmpiri intra de is cincu de mangianu e is dexi de noti podeus andai a cresia, podeus bessiri po nci fuliai s’àliga, podeus bessiri po fai fai is abisòngius a su cani, podeus portai is animalis anca est su veterinàriu, ma sena de fai atropèllius de genti e abarrendi assumnacus a unu metru de tretu de is àteras personis.
Intra de is cincu e is dexi podeus bessiri a si fai una passillada o a fai unu pagheddu de sport, fintzas bessendi foras de su comunu nostru, ma bastit chi s’àteru comunu puru siat in zona groga. Fadendi sport depeus abarrai assumancus a duus metrus de tretu de is àterus. Podeus bessiri fintzas a bitzicreta.
Podeus abitai parcus e giardinus pùblicus, ma sena de fai atropèllius de genti.
Fait a setzi in màchina cun àtera genti? Si depeus setzi in màchina paris cun àteras personis, si depeus arregordai ca a costau de su ghiadori non si ddoi podit setzi nemus e ca, totu a su prus, si podint setzi duas personis in dònnia filera de setzidòrgius de apalas; totus cun sa mascheredda!
Podeus andai a is interrus de parentis a strintu, donendi atentu mannu e arrespetendi totu is arrègulas nodidas (su stesiamentu intra de una personi e un’àtera, su de si frigai fatu fatu is manus cun gel disinfetadori, su de portai sèmpiri sa mascheredda).
Trastus de amparu individuali. Totu is traballadoris e is professionistas chi tenint un’istùdiu depint portai is trastus de amparu individuali.
Arregordaus ca sa mascheredda bolit posta siat candu seus in logu abertu, siat candu seus in d-unu logu serrau diferenti de domu nosta. Is pipius chi tenint prus pagu de ses annus e is personis chi tenint maladias particularis chi non ddis permitint de si dda ponni, non tenint s’òbligu de si ponni sa mascheredda, aici etotu candu seus fadendi sport, po papai o po bufai, candu seus a solus o cun is familiaris chi bivint cun nosu non teneus s’òbrigu de si dda ponni. In domu nosta però, si ddoi intrat àtera genti, est mellus a si dda ponni, aici etotu comenti dda depint portai is òspitis nostus.
Ristorantis, pitzerias e àteras butegas. Is ristorantis, is posadas, is tzilleris, is pitzerias, is ofellerias e gelaterias funt abertus e fait a ddoi intrai po papai o po bufai intra de is cincu de mangianu e is ses de merii. De is ses de merii fintzas a is dexi de noti fait a ddoi intrai sceti po ndi pigai sa cosa de papai o de bufai, chi però bolit portada a domu.
In is zonas in colori grogu totu is butegas funt abertas, ma tocat a arrespetai su stesiamentu de assumancus unu metru, a non fai atropèllius de genti aintru, a non si ddoi stentai prus de su chi serbit po fai is còmporas chi depeus fai.
Cassa e pisca. In is diis e in is zonas grogas fait a andai a cassa (si est aberta) e a piscai.
Palestras, piscinas e àterus tzentrus po su stai beni. Arregordaus ca palestras, piscinas, tzentrus po annadai, tzentrus po su stai beni e tzentrus termalis sunt serraus (francu cussus chi serbint po fainas terapèuticas e de riabilitatzioni).
Sport. Is sport de cuntatu funt suspèndius e funt proibidas totu is garas e is trivas. Si podint fai is sport a sa sola e, comenti si siat, arrespetendi su stesiamentu de seguresa.
Ofìtzius pùblicus. Infinis, po su chi pertocat is ofìtzius pùblicus, est mellus a domandai su chi si serbit telefonendi o cun sa posta eletrònica. Si depeus andai po s’amarolla a logu de ofìtziu pùblicu, est mellus a prenotai cun d-una telefonada e a pigai un’apuntamentu cun s’impiegau chi depeus circai. (a.i.g.)
Custu est su liòngiu a sa pàgina Internet de su Guvernu, innui si ddoi agatant fintzas àterus inditus: